गीतरामायण शब्द | GeetRamayan Lyrics
  •  
  • Box-C-29
  • 21)बोलले इतुके मज श्रीराम
  • Bolale Ituke Maj Shriram
  • ग.दि.माडगूळकर(गदिमा) | Ga.Di.Madgulkar


  •  

    शेवटीं करितां नम्र प्रणाम
    बोलले इतुके मज श्रीराम-

    "अयोध्येस तूं परत सुमंता
    कुशल आमुचें कथुनी तांतां
    पदवंदन करि माझ्याकरिंता
    तातचरण ते वंदनीय रे, शततीर्थांचें धाम"

    "अंतःपुरिं त्या दोघी माता
    अतीव दुःखी असतिल सूता
    धीर देई त्या धरुनी शांतता


    सौख्य आमुचे सांगुन त्यांच्या शोका देई विराम"

    "सांग माउली कौसल्येसी
    सुखांत सीता सुत वनवासी
    पूजित जा तूं नित्‌ अग्‍निशीं
    तुझिया श्रवणीं सदा असावा मुनिवरघोषित साम"

    "वडिलपणाची जाणिव सोडुनि
    सवतींशीं करि वर्तन जननी
    मग्न पतीच्या रहा पूजनीं
    तव हृदयाविन त्या जिवासी अन्य नसे विश्राम"

    "राजधर्म तूं आठव आई
    अभिषिक्तातें गुण वय नाहीं
    दे भरतासी मान प्रत्यहीं
    पढव सुमंता, विनयाने हें, सांगुन माझे नाम"

    "सांग जाउनी कुमार भरता
    हो युवराजा, स्वीकर सत्ता
    प्रजाजनांवर ठेवी ममता
    भोग सुखाचा अखंड घेई, मनिं राही निष्काम"

    "छत्र शिरावर तुझ्या पित्याचें
    पाळच वत्सा, वचन तयांचें
    सार्थक कर त्या वृद्धपणाचें
    राज्य नीतिनें करुन वाढवी रघुवंशाचें नाम"

    "काय सांगणे तुज धीमंता,
    उदारधी तूं सर्व जाणता
    पुत्रवियोगिनि माझी माता
    तुझ्या वर्तनें तिला भासवी भरत तोच श्रीराम"

    बोलत बोलत ते गहिंवरले
    कमलनयनिं त्या आसूं भरलें
    करुण दृश्य तें अजुन न सरले -
    गंगातीरीं-सौमित्रीसह-उभे जानकी-राम


गदिमा गौरव | Special Quotes
  • पु.ल.देशपांडे:
    महाराष्ट्रावर आणि मराठी भाषेवर तर माडगूळकरांचे अनंत उपकार आहेत.इतर काहीही देण्यार्‍या माणसापेक्षा समाजाला गाणे देणार्‍या माणसाचे उपकार फार मोठे असतात.'Song has the longest life' अशी एक म्हण आहे.एक गाणे माणसांच्या पिढ्यानुपिढ्या बांधून ठेवते. एवढेच कशाला?.माणसाच्या मनाचे लहानमोठेपण ,रागव्देष घटकेत घालवुन टाकण्याचे गाण्याइतके दुसर्‍या कुठल्याही कलेत सामर्थ्य नसते.हजारो माणसे एक गाणे जेव्हा आनंदाने गातात त्या वेळेला त्या हजारांचे एक अंतःकरण होते.माडगूळकरांनी तर अशी शेकडो गाणी महाराष्ट्राला दिली.चित्रपटांना दिली, तमाशाच्या फडात, देवळात, शाळेत, तरुणांच्या मेळाव्यात, माजघरात, देवघरात, शेतामळ्यात, विव्दज्जनपरिषदेत...त्यांच्या गाण्याचा संचार नाही कुठे?.मराठी नाट्यसृष्टीत जी कामगिरी कै.देवलांनी केली,त्याच तोलामोलाचे कार्य माडगूळकर यांनी मराठी चित्रसृष्टीत केले आहे...म्हणूनच आम्ही सर्व माडगूळकर कलावंशाचे वारसदार ('Madgulkar Boys') आहोत,हे सांगायला मला अभिमान वाटतो.
संबंधीत गाणी-कविता | Related Songs-Poems