गदिमा नवनित
  • पद्मासमान जन्मे हे काव्य जीवनी या या जीवनात काव्ये, काव्यात जीवने या!
मराठी युनिकोड फॉन्ट
गीतरामायण शब्द | GeetRamayan Lyrics
  •  
  • Box-C-29
  • 46)नभा भेदुनी नाद चालले
  • Nabha Bheduni Naad Chalale
  • ग.दि.माडगूळकर(गदिमा) | Ga.Di.Madgulkar


  •  

    नभा भेदुनी नाद चालले शंख दुंदुभींचे
    अनुपमेय हो सुरूं युद्ध हें रामरावणांचें

    सशंख राक्षसगण तो दिसला
    कष्णघनांवर बलाकमला
    मुखांतुनी शत गर्जे चपला
    रणांगणावर कोसळलें तों पाउस बाणांचे

    नाचत थय थय खिंकाळति हय
    गजगर्जित करि नादसमन्वय
    भीषणता ती जणूं नादमय
    त्या नादांतच मिळले पदरव प्लवग-राक्षसांचे

    दंत दाबुनी निज अधरांवर
    वानरताडण करिती निशाचर
    नभांत उडती सदेह वानर
    शस्त्र म्हणुन ते घाव घालिती वृक्ष-पर्वतांचे

    "जय दाशरथी, जय तारासुत"
    प्रहार करिती वानर गर्जत
    झेलित शस्‍त्रां अथवा हाणित
    भरास आलें द्वंद्व जणूं कीं महासागरांचे

    गदा, शूळ वा लागुन शक्ति
    राक्षस वानर घेती मुक्ति
    रणांत पडती अपुल्या रक्तीं
    'जय लंकाधिप' घोष घुमविती अरी वानरांचे

    द्वीप कोसळे, पडला घोडा
    वर बाणांचा सडा वांकडा
    'हाणा मारा, ठोका तोडा'
    संहारार्थी अर्थ धावती सर्व भाषितांचे

    रणांत मरतां आनंदानें
    मांसकर्दमीं फुलतीं वदनें
    तींहि तुडविलीं जातीं चरणें
    रणभूमीवर ओहळ सुटले लाल शोणिताचे

    कलेवरावर पडे कलेवर
    ऋक्ष, निशाचर, नकळे वानर
    मरणांहुनही शौर्य भयंकर
    कैक योजनें उडुनी जाती भाग अवयवांचे

    चक्रें, चरणें, हस्त, लांगुलें
    शुंडा, ग्रीवा, शिरें, पाउलें
    पडलें तें शतखण्डित झालें
    प्रलयकाळसें अंग थरारे धरणी-गगनाचें

    द्वंद्व तरी हो कुठें कुणाचें
    काळमुखांतुन कोणी वांचे
    कुठे कुणाचें कबंध नाचे
    धुमाळींत त्या कोणा नुरलें भानच कोणाचें


गदिमा गौरव | Special Quotes
  • कविवर्य कुसुमाग्रज (गदिमा गेले तेव्हा)
    महाराष्ट्र सरस्वतीचा लाडका पुत्र काळाने हिरावुन नेला.माडगूळकरांच्या निधनाने मराठी साहित्यातील उत्तम संस्कार मावळला.आणि एक सुंदर संगीत हरपले.विविध रसांवर विलक्षण प्रभुत्व करणारा त्यांच्या सारखा कवी अलीकडच्या काळांत झाला नाही.गीतरामायणाने माडगूळकर चिरंजीव झाले पण मराठीतील विविध रसांचे आणि कवितेतील अपूर्व चैतन्य गेले.
संबंधीत गाणी-कविता | Related Songs-Poems