गदिमा नवनित
  • विठ्ठलाचे पायी थरारली वीट, उठला हुंदका देहुच्या वार्‍यात,तुका समाधीत चाळवला.
    संत माळेतील मणी शेवटला,आज ओघळला एकाएकी....
मराठी युनिकोड फॉन्ट
गीतरामायण शब्द | GeetRamayan Lyrics
  •  
  • Box-C-29
  • 52)त्रिवार जयजयकार,रामा
  • Trivar JaiJaikar Rama
  • ग.दि.माडगूळकर(गदिमा) | Ga.Di.Madgulkar


  •  

    त्रिवार जयजयकार, रामा, त्रिवार जयजयकार
    पुष्पक यानांतुनी उतरलें स्वर्गसौख्य साकार

    तुला चिंतिते सुदीर्घ आयु
    पुण्यसलीला सरिता सरयु
    पुलकित पृथ्वी, पुलकित वायु
    आज अहल्येपुरी जाहला नगरीचा उद्धार

    शिवचापासम विरह भंगला
    स्वयंवरासम समय रंगला
    अधिर अयोध्यापुरी मंगला
    सानंदाश्रू तुला अर्पिते दृढ प्रीतीचे हार

    तव दृष्टीच्या पावन स्पर्षे
    आज मांडिला उत्सव हर्षे
    मनें विसरलीं चौदा वर्षे
    सुसज्ज आहे तव सिंहासन, करी प्रभो स्वीकार

    तुझ्या मस्तकी जलें शिंपतां
    सप्त नद्यांना मिळो तीर्थता
    अभिषिक्ता तुज जाणिव देतां
    मुनिवचनांचा पुन्हां हो‌उं दे अर्थासह उच्‍चार

    पितृकामना पुरी हो‍उं दे
    रामराज्य या पुरीं ये‍उं दे
    तें कौसल्या माय पाहुं दे
    राज्ञीसह तूं परंपरेनें भोग तुझा अधिकार

    प्रजाजनीं जें रचिलें स्वप्नीं
    मूर्त दिसे तें स्वप्न लोचनीं
    राजा राघव, सीता राज्ञी
    चतुर्वेदसे लोक पूजिती रघुकुलदीपक चार

    रामराज्य या असतां भूवर
    कलंक केवल चंद्रकलेवर
    कज्जल-रेखित स्‍त्रीनयनांवर
    विचारांतलें सत्य आणतिल अयोध्येंत आचार

    समयिं वर्षतिल मेघ धरेवर
    सत्यशालिनी धरा निरंतर
    सेवारत जन, स्वधर्मतत्पर
    "शांतिः शांतिः" मुनी वांच्छिती, ती घेवो आकार


गदिमा गौरव | Special Quotes
  • पु.ल.देशपांडे:
    महाराष्ट्रावर आणि मराठी भाषेवर तर माडगूळकरांचे अनंत उपकार आहेत.इतर काहीही देण्यार्‍या माणसापेक्षा समाजाला गाणे देणार्‍या माणसाचे उपकार फार मोठे असतात.'Song has the longest life' अशी एक म्हण आहे.एक गाणे माणसांच्या पिढ्यानुपिढ्या बांधून ठेवते. एवढेच कशाला?.माणसाच्या मनाचे लहानमोठेपण ,रागव्देष घटकेत घालवुन टाकण्याचे गाण्याइतके दुसर्‍या कुठल्याही कलेत सामर्थ्य नसते.हजारो माणसे एक गाणे जेव्हा आनंदाने गातात त्या वेळेला त्या हजारांचे एक अंतःकरण होते.माडगूळकरांनी तर अशी शेकडो गाणी महाराष्ट्राला दिली.चित्रपटांना दिली, तमाशाच्या फडात, देवळात, शाळेत, तरुणांच्या मेळाव्यात, माजघरात, देवघरात, शेतामळ्यात, विव्दज्जनपरिषदेत...त्यांच्या गाण्याचा संचार नाही कुठे?.मराठी नाट्यसृष्टीत जी कामगिरी कै.देवलांनी केली,त्याच तोलामोलाचे कार्य माडगूळकर यांनी मराठी चित्रसृष्टीत केले आहे...म्हणूनच आम्ही सर्व माडगूळकर कलावंशाचे वारसदार ('Madgulkar Boys') आहोत,हे सांगायला मला अभिमान वाटतो.
संबंधीत गाणी-कविता | Related Songs-Poems