गीतरामायण शब्द | GeetRamayan Lyrics
  •  
  • Box-C-29
  • 54)डोहाळे पुरवा रघुकुलतिलका माझे
  • Dohale Purava Raghukultilaka Maze
  • ग.दि.माडगूळकर(गदिमा) | Ga.Di.Madgulkar


  •  

    ओठांत थांबुनी सशब्द आशा लाजे
    डोहाळे पुरवा रघुकुलतिलका, माझे

    मज उगा वाटतें वनीं विहारा जावें
    पांखरांसारखे मुक्त स्वरांनीं गावें
    कानांत बांसरी वंशवनांतिल वाजे

    वाटतें धरावें कुशींत पाडस भोळें
    मज आवडती ते विशाल निर्मळ डोळे
    चुंबीन त्यास मी, भरविन चारा चोजें

    वल्कलें भिजावीं जळांत माझीं सारीं
    घागरी कटिवर, करांत घ्यावी झारी
    मस्तकीं असावें दुजा घटाचें ओझें

    वाटतें खणावें, कंदमुळें काढावीं
    तीं हलक्या हातें लीलेनें सोलावीं
    चाखून बघावें अमृतान्न तें ताजें

    सांजेस बसावें आम्रतरूच्या खालीं
    गळतील सुगंधित जधीं मंजिरी भालीं
    करतील गर्जना दुरुन वनाचे राजे

    घेऊन धनुतें, बांधुन भाता पाठीं
    वाटतें फिरावें वनांत मृगयेसाठीं
    पाडीत फिरावें दिसेल श्वापद जें जें

    वाटतें प्रभातीं बसुनी वेदीपाशीं
    वेदांत करावा प्रकांड अध्वर्यूशी
    लालिमा मुखावर यावा पावकतेजें

    कां हंसतां ऐसें मला खुळीला देवा ?
    एवढा तरी हा हट्ट गडे पुरवावा
    का विनोद ऐसा प्रिया, अवेळीं साजे ?


गदिमा गौरव | Special Quotes
  • बा.भ.बोरकर
    वस्तुत: माडगूळकरांचे गीतरामायण प्रभूरामचंद्र सिंहासनस्थ झाल्यावर सुरनरांच्या जयजयकारांत संपते. पण माडगूळकरांची प्रतिभा ते तिथे संपवित नाहीत...छंद आणि स्वर विराम पावले तरी तिचे तेज सरणारे दु:ख आपल्या अंतरात रेंगाळतच रहाते.यथाकाळ या रामायणाने पुन्हा नवा अवतार घ्यावा म्हणूनच तर त्यांच्या हातुन हे घडले नसेल?एवढे मात्र खास की तोपर्यंत आणि त्यानंतर देखील यातील काही गीते गीतरामायणासारखी चिरंजीव होऊन राहतील आणि त्या बरोबरच माडगूळकरांचे-माझ्या बंधुतुल्य मित्राचे नाव देखील!.
संबंधीत गाणी-कविता | Related Songs-Poems