गदिमांची बालगीते/बालकविता | Balgeete/Children Songs
  •  
  • Box-C-27
  • बिनभितीची शाळा
  • Binbhintichi Shala
  • ग.दि.माडगूळकर(गदिमा) | Ga.Di.Madgulkar


  •  

    बिनभितीची शाळा
    हिडू ओढे, धुंडू ओहळ
    झाडावरचे काढू मोहळ
    चिडत्या, डसत्या मधमाशांशी
    जरा सामना करू
    बघू बंगला या मुंग्यांचा
    सूर ऐकूया त्या भुंग्यांचा
    फुलाफुलांचे रंग दाखवित
    फिरते फुलपाखरू
    बिनभितीची उघडी शाळा
    लाखो इथले गुरू
    झाडे, वेली, पशू, पाखरे


    यांशी गोष्ट करू
    भल्या सकाळी उन्हात न्हाऊ
    ऐन दुपारी पर्ह्यात पोहू
    सायंकाळी मोजू चांदण्या
    गणती त्यांची करू
    कसा जोंधळा रानी रुजतो?
    उंदिरमामा कोठे निजतो ?
    खबदाडीतील खजिना त्याचा
    फस्त खाऊनी करू
    सुग्रण बांधी उलटा वाडा
    पाण्यावरती चाले घोडा
    मासोळीसम बिनपायांचे
    बेडकीचे लेकरू
    हलवू झाडे चिटबोरांची
    पिसे शोधुया वनी मोरांची
    माळावरची बिळे चला रे
    काठीने पोखरू


गदिमा गौरव | Special Quotes
  • पु.ल.देशपांडे:
    महाराष्ट्रावर आणि मराठी भाषेवर तर माडगूळकरांचे अनंत उपकार आहेत.इतर काहीही देण्यार्‍या माणसापेक्षा समाजाला गाणे देणार्‍या माणसाचे उपकार फार मोठे असतात.'Song has the longest life' अशी एक म्हण आहे.एक गाणे माणसांच्या पिढ्यानुपिढ्या बांधून ठेवते. एवढेच कशाला?.माणसाच्या मनाचे लहानमोठेपण ,रागव्देष घटकेत घालवुन टाकण्याचे गाण्याइतके दुसर्‍या कुठल्याही कलेत सामर्थ्य नसते.हजारो माणसे एक गाणे जेव्हा आनंदाने गातात त्या वेळेला त्या हजारांचे एक अंतःकरण होते.माडगूळकरांनी तर अशी शेकडो गाणी महाराष्ट्राला दिली.चित्रपटांना दिली, तमाशाच्या फडात, देवळात, शाळेत, तरुणांच्या मेळाव्यात, माजघरात, देवघरात, शेतामळ्यात, विव्दज्जनपरिषदेत...त्यांच्या गाण्याचा संचार नाही कुठे?.मराठी नाट्यसृष्टीत जी कामगिरी कै.देवलांनी केली,त्याच तोलामोलाचे कार्य माडगूळकर यांनी मराठी चित्रसृष्टीत केले आहे...म्हणूनच आम्ही सर्व माडगूळकर कलावंशाचे वारसदार ('Madgulkar Boys') आहोत,हे सांगायला मला अभिमान वाटतो.
संबंधीत गाणी-कविता | Related Songs-Poems