ग.दि.माडगूळकर(गदिमा) | Ga.Di.Madgulkar
सांगा ना हो आजोबा
कोण असतो चांदोबा ?
पंख नाहीत, पाय नाहीत
फिरतो कसा कुणाला माहीत.
बघावे तेव्हा खुषीत असतो
हसत असतो वेडोबा.
आजी म्हणते ‘चंद्र’ देव.
रागावेल तो, आधी जेव.
नाहीतर, तुझा दुधभात,
पळवून नेतील बोकोबा.
‘चांदूमामा’ म्हणते आई,
घरी कधी तो येत नाही
असला कसला भाऊ तिचा हा
उंचावरचा शहाणोबा.
बाबा म्हणतात ‘कळेल कळेल
तुझे उत्तर तुला मिळेल.
मोठा हो, शाळा शीक
आजच कसला खोळंबा ?’
अधांतरी हा फिरतो गोल
त्याला कसले देता मोल?
चांद म्हणजे माती दगड,
बडबड करीती दादोबा.
कोण असतो चांदोबा