गदिमा नवनित
  • पळून गेलेल्या काळाच्या कानात,
    माझ्या गीतांची भिकबाळी डोलते आहे.
मराठी युनिकोड फॉन्ट
गदिमांची बालगीते/बालकविता | Balgeete/Children Songs
  •  
  • Box-C-27
  • मी न चोरीले लोणी
  • Mi Na Chorile Loni
  • ग.दि.माडगूळकर(गदिमा) | Ga.Di.Madgulkar


  •  

    सांगती खोटे त्या गौळणी
    आई ग, मी न चोरीले लोणी
    मला न चोरी शब्द ठाउका
    आळच घेती वृथा गोपिका
    ऐकवती तरी कशी तुला ही निदेची बोलणी?
    मी हा इवला, पोर चिमुकला
    सुचेल चोरी कैसी मजला ?
    काय जाणु मी कुठे कुणाची लोण्याची बोगणी?


    घट लोण्याचे शिक्यावरती
    ते येतील का माझ्या हाती?
    मुख वत्सांचे काय पोचते, दाराच्या तोरणी?
    का नंदाच्या कुळात जगती
    मीच उपजलो पुन: मारुती?
    उपजताच जो उडे अंबरी धरण्या वासरमणी?

    मी नच जातो सोडुनिया घर
    इथेच असतो सार्या दिसभर
    दादासंगे खेळ खेळतो सोप्यावर, अंगणी
    कुशीत निजतो तुझ्याच राती
    जागविसी मज तूच प्रभाती
    नवनीताचे नाव न घेतो स्वप्नातील भाषणी
    सहज बिलगता लाडे लाडे
    तुझ्या उरी मज सुधा सापडे
    माझ्यासाठी ओसंडती घट, केल्याविन मागणी
    कोणा घरी मी का मग जाऊ ?
    कशास चोरून लोणी खाऊ?
    साठविती का कुणी सुधा त्या मातीच्या रांजणी?


गदिमा गौरव | Special Quotes
  • पु.ल.देशपांडे:
    महाराष्ट्रावर आणि मराठी भाषेवर तर माडगूळकरांचे अनंत उपकार आहेत.इतर काहीही देण्यार्‍या माणसापेक्षा समाजाला गाणे देणार्‍या माणसाचे उपकार फार मोठे असतात.'Song has the longest life' अशी एक म्हण आहे.एक गाणे माणसांच्या पिढ्यानुपिढ्या बांधून ठेवते. एवढेच कशाला?.माणसाच्या मनाचे लहानमोठेपण ,रागव्देष घटकेत घालवुन टाकण्याचे गाण्याइतके दुसर्‍या कुठल्याही कलेत सामर्थ्य नसते.हजारो माणसे एक गाणे जेव्हा आनंदाने गातात त्या वेळेला त्या हजारांचे एक अंतःकरण होते.माडगूळकरांनी तर अशी शेकडो गाणी महाराष्ट्राला दिली.चित्रपटांना दिली, तमाशाच्या फडात, देवळात, शाळेत, तरुणांच्या मेळाव्यात, माजघरात, देवघरात, शेतामळ्यात, विव्दज्जनपरिषदेत...त्यांच्या गाण्याचा संचार नाही कुठे?.मराठी नाट्यसृष्टीत जी कामगिरी कै.देवलांनी केली,त्याच तोलामोलाचे कार्य माडगूळकर यांनी मराठी चित्रसृष्टीत केले आहे...म्हणूनच आम्ही सर्व माडगूळकर कलावंशाचे वारसदार ('Madgulkar Boys') आहोत,हे सांगायला मला अभिमान वाटतो.
संबंधीत गाणी-कविता | Related Songs-Poems