गदिमांची बालगीते/बालकविता | Balgeete/Children Songs
  •  
  • Box-C-27
  • महाराष्ट्र-गीत
  • Maharashtra Geet
  • ग.दि.माडगूळकर(गदिमा) | Ga.Di.Madgulkar


  •  

    शिवनिष्ठा येथ असे सतत जागती
    अग्रेसर प्रांत महाराष्ट्र भारती!

    भीमकाय सह्यगिरी पाठीशी उभा
    बलशाली आकांक्षा भेदिती नभा
    सरितांसह प्रगती इथे नित्य वाहती

    पैठणचे प्रेम अमित देश कोकणा
    पंढरीस ये विदर्भ देवदर्शना
    अजरामर ऐक्यभाव येथ दृढमती

    इतिहासा

    ज्ञात असे शौर्य येथले
    यज्ञाग्नि सर्वप्रथम येथ चेतले
    देशास्तव प्रथम दिल्या इथुनि आहुती

    परदास्ये होते जधि राष्ट्र घेरले
    संतांनी सद्विचार येथ पेरले
    ज्ञानाचे अमर दीप अजुन तेवती

    समतेचा बोध करी क्षेत्र पंढरी
    वेरुळची एकएक अतुल ओवरी
    अजुन अजिठ्यात उभी चित्र-संस्कृती

    शिवराजा, टिळक, भीम, गोखले, फुले
    अभ्यासित आदर्शा वाढती मुले
    साहित्यिक नवविचार येथ सांगती

    वाढतसे ज्ञान इथे खडक फोडुनी
    साकळल्या रूढींचे बंध तोडुनी
    विद्यार्थ्या येथ नसे वाण कोणती

    देवदत्त जो निसर्ग, आम्हा पुरे
    उद्योगे उद्याने उभवू गोपुरे
    सहकारा धुरिण इथे पूर्ण जाणती

    सुस्थिरल्या पंचायती, भागपरिषदा
    वाढविती श्रमिक कृषिक खपुन संपदा
    भवितव्य कोटी हात कसुन कोरिती

    पूर्णत्वा जाती इथे गृहित योजना
    सार्थकता लाभतसे नव-नियोजना
    प्रांत न हा, प्रगतीची सधन आकृती

    चक्रांकित तीन-रंगी राष्ट्रिय ध्वजा
    देवदूत मानी तिला येथची प्रजा
    वाढविते आप्तभाव हा सभोवती.


गदिमा गौरव | Special Quotes
  • पु.ल.देशपांडे:
    महाराष्ट्रावर आणि मराठी भाषेवर तर माडगूळकरांचे अनंत उपकार आहेत.इतर काहीही देण्यार्‍या माणसापेक्षा समाजाला गाणे देणार्‍या माणसाचे उपकार फार मोठे असतात.'Song has the longest life' अशी एक म्हण आहे.एक गाणे माणसांच्या पिढ्यानुपिढ्या बांधून ठेवते. एवढेच कशाला?.माणसाच्या मनाचे लहानमोठेपण ,रागव्देष घटकेत घालवुन टाकण्याचे गाण्याइतके दुसर्‍या कुठल्याही कलेत सामर्थ्य नसते.हजारो माणसे एक गाणे जेव्हा आनंदाने गातात त्या वेळेला त्या हजारांचे एक अंतःकरण होते.माडगूळकरांनी तर अशी शेकडो गाणी महाराष्ट्राला दिली.चित्रपटांना दिली, तमाशाच्या फडात, देवळात, शाळेत, तरुणांच्या मेळाव्यात, माजघरात, देवघरात, शेतामळ्यात, विव्दज्जनपरिषदेत...त्यांच्या गाण्याचा संचार नाही कुठे?.मराठी नाट्यसृष्टीत जी कामगिरी कै.देवलांनी केली,त्याच तोलामोलाचे कार्य माडगूळकर यांनी मराठी चित्रसृष्टीत केले आहे...म्हणूनच आम्ही सर्व माडगूळकर कलावंशाचे वारसदार ('Madgulkar Boys') आहोत,हे सांगायला मला अभिमान वाटतो.
संबंधीत गाणी-कविता | Related Songs-Poems