गदिमा नवनित
  • पद्मासमान जन्मे हे काव्य जीवनी या या जीवनात काव्ये, काव्यात जीवने या!
मराठी युनिकोड फॉन्ट
गदिमांची बालगीते/बालकविता | Balgeete/Children Songs
  •  
  • Box-C-27
  • बाल शिवाजी
  • Bal Shivaji
  • ग.दि.माडगूळकर(गदिमा) | Ga.Di.Madgulkar


  •  

    शिक्षिका :
    एक होउनी गेला पूर्वी राजाचा लेक
    नांव जयाचे अजुन घेती दुनियेतील लोक
    तो राजाचा लेक होऊनी घोड्यावर स्वार
    दर्याकपारी हिडुनी घेई लोक समाचार
    वाड्या खेडी वस्त्यांमाजी जाई तो थेट
    गरीब भाबड्या प्रजाजनांची घेत प्रीत भेट
    त्याच्या भवती जमती काळे कुणब्याचे बाळ

    राजपुत्र त्या मुलांत खेळे मर्दानी खेळ
    लाठी काठी बर्ची भाला लेजीम तलवार
    केव्हा केव्हा जुन्या कहाण्या, ग्रंथातील सार
    तो नाकेला कृष्ण सांवळा उमदा शिवराज
    बालवयातच मराठदेशी झाला महाराज
    प्रेम प्रीतीने आप्त जोडुनी करी एकजूट
    एके दिवशी शिवालयी तो करी उंच मूठ

    बाल शिवाजी :
    शपथ शिवाची तुम्हा घालतो
    मनी असे ते उघड बोलतो
    उगीच म्हणती मजसी राजा
    मुलुख पराधिन तुमचा माझा
    अंमल परका इथे चालतो
    मनी असे ते उघड बोलतो
    कोण चालवी येथे सत्ता?
    लढती मराठे कोणाकरता ?
    कोण येथला न्याय तोलतो?
    मनी असे ते उघड बोलतो
    सत्ता भोगी आदिलशाही,
    निजामशाही, मोंगलशाही
    तुकड्यासाठी जन्म घालतो
    मनी असे ते उघड बोलतो

    एक सरदार :
    काय करू ते बोल !
    राजा ! काय करू ते बोल !

    बाल शिवाजी :
    ऊठ मराठ्या ऊठ !
    ऊठ मराठ्या निशाण भगवे उंच आभाळी तोल
    देश आपुला अपुली भूमी
    आपण आपुले होऊ स्वामी
    परसत्तेच्या पायी मरता काय जिण्याला मोल!
    याच घडीला घ्यारे शपथा
    जीवन देऊ देशाकरिता
    दर्याकड्यातून घुमवू तुमच्या आतड्यांतले बोल

    बाल शिवाजी व बाल सरदार :
    शपथ शिवाची, सदाशिवाची
    शंभू महादेवाची
    या देशातून हुसकू परका
    उंच उभारू वरि जरिपटका
    स्वर्गस्थांच्या जावो कानी
    हीच प्रतिज्ञा नव्या पिढीची
    कुरवंडी या करूं जिवाची
    शपथ शिवाची, सदाशिवाची, शंभू महादेवाची !
    हरहर महादेव ! जय भवानी !!


गदिमा गौरव | Special Quotes
  • पु.ल.देशपांडे:
    महाराष्ट्रावर आणि मराठी भाषेवर तर माडगूळकरांचे अनंत उपकार आहेत.इतर काहीही देण्यार्‍या माणसापेक्षा समाजाला गाणे देणार्‍या माणसाचे उपकार फार मोठे असतात.'Song has the longest life' अशी एक म्हण आहे.एक गाणे माणसांच्या पिढ्यानुपिढ्या बांधून ठेवते. एवढेच कशाला?.माणसाच्या मनाचे लहानमोठेपण ,रागव्देष घटकेत घालवुन टाकण्याचे गाण्याइतके दुसर्‍या कुठल्याही कलेत सामर्थ्य नसते.हजारो माणसे एक गाणे जेव्हा आनंदाने गातात त्या वेळेला त्या हजारांचे एक अंतःकरण होते.माडगूळकरांनी तर अशी शेकडो गाणी महाराष्ट्राला दिली.चित्रपटांना दिली, तमाशाच्या फडात, देवळात, शाळेत, तरुणांच्या मेळाव्यात, माजघरात, देवघरात, शेतामळ्यात, विव्दज्जनपरिषदेत...त्यांच्या गाण्याचा संचार नाही कुठे?.मराठी नाट्यसृष्टीत जी कामगिरी कै.देवलांनी केली,त्याच तोलामोलाचे कार्य माडगूळकर यांनी मराठी चित्रसृष्टीत केले आहे...म्हणूनच आम्ही सर्व माडगूळकर कलावंशाचे वारसदार ('Madgulkar Boys') आहोत,हे सांगायला मला अभिमान वाटतो.
संबंधीत गाणी-कविता | Related Songs-Poems