Kadhitari Tumhi Yawe Ithe
ग.दि.माडगूळकर(गदिमा) | Ga.Di.Madgulkar
कधीतरी तुम्ही यावे इथे या घरात
कैक दिवस होता हेतू असा अंतरात
शपथ तुमची, शपथ तुमची !
आज भाग्य आले हाती, तरी उरी वाटे भीती
मनातले हितगूज सारे राहिले मनात
शपथ तुमची, शपथ तुमची !
जीव बावरे हा भोळा, नीर
दाटू पाहे डोळा
बोल बोल ओठावरचा विरघळे मुखात
शपथ तुमची, शपथ तुमची !
मनी गुंफिलेल्या ओळी, ओघळल्या ऐत्यावेळी
सूर मात्र केवळ उरले गीत गायनात
शपथ तुमची, शपथ तुमची !
शपथ तुम्हा तुमची देवा, मूक भाव जाणून घ्यावा
पुन्हा नका लोटू मजसी स्वप्न चिंतनात
शपथ तुमची, शपथ तुमची !