गदिमा नवनित
  • दिला जन्म तू,विश्व हे दाविलेस.किती कष्ट माये,सुखे साहिलेस,
    जिण्यालागि आकार माझ्या दिलास,तुझ्या वंदितो माउली,पाउलांस!
गीतरामायण (आकाशवाणी,संगीत:सुधीर फडके | Geetramayan (Akashwani)
  • आपल्या सगळ्यांचे लाडके गीतरामायण ६० व्या वर्षात (हीरकमहोत्सवी) पदार्पण करीत आहे,महाकवी ग.दि.माडगूळकर व संगीतसुर्य सुधीर फडके यांच्या अलौकिक प्रतिभेतून साकारलेल्या गीतरामायणाची वाटचाल १ एप्रिल १९५५ रोजी पुणे आकाशवाणी पासून सुरु झाली.

    आज साठ वर्षे झाली तरीही रेडिओ, ग्रामोफोन, वृत्तपत्रे, कॅसेट, टेलिव्हीजन, संगणक, सीडी, इंटरनेट,फेसबुक,मोबाईल अ‍ॅप या सर्वच माध्यमातून यशस्वीपणे प्रवास करणारा हा एकमेव कलाविष्कार असावा!.

    गदिमा व बाबुजींबरोबर गीतरामायणाच्या निर्मितीत ज्या महान कलाकारांचा वाटा आहे त्यांचा उल्लेख करणे आज अपरिहार्य आहे,संयोजक सिताकांत लाड,गायक-गायिका माणिक वर्मा,लता मंगेशकर,ललिता फडके,मालती पांडे,वसंतराव देशपांडे,गजाननराव वाटवे,राम फाटक,व्ही.एल.इनामदार,सुरेश हळदणकर,बबनराव नावडीकर,चंद्रकांत गोखले,प्रमोदिनी जोशी,मंदाकिनी पांडे,योगिनी जोगळेकर,कुमुदिनी पेडणेकर,सुमन माटे,जानकी अय्यर,संगीत संयोजक प्रभाकर जोग व सौ.जोग,वादक अप्पा इनामदार,अण्णा जोशी,केशवराव बडगे व अनेक दिग्गज कलाकारांच्या अथक प्रयत्नातच गीतरामायणाचे यश सामावले आहे.
  • Box-C-19
  • सांवळा ग रामचंद्र
    Sawala Ga Ramchandra

  • गीतकार: ग.दि.माडगूळकर      Lyricist: Ga.Di.Madgulkar
  • संगीतकार: सुधीर फडके      Music Composer: Sudhir Phadke
  • गायक: ललिता फडके      Singer: Lalita Phadke
  • अल्बम: गीतरामायण (आकाशवाणी)      Album: GeetRamayan (Akashwani)






  •  गदिमा.कॉम साईटवरील गाणी कशी ऐकावीत? | How To Play Marathi Songs On Gadima.com?

  • सांवळा ग रामचंद्र
    माझ्या मांडीवर न्हातो
    अष्टगंधांचा सुवास
    निळ्या कमळांना येतो

    सांवळा ग रामचंद्र
    माझ्या हातांनीं जेवतो
    उरलेल्या घासांसाठीं
    थवा राघूंचा थांबतो

    सांवळा ग रामचंद्र
    रत्नमंचकीं झोंपतो
    त्याला पाहतां लाजून
    चंद्र आभाळीं लोपतो

    सांवळा ग रामचंद्र
    चार भावात खेळतो
    हीरकांच्या मेळाव्यांत
    नीलमणी उजळतो

    सांवळा ग रामचंद्र
    करी भावंडांसी प्रीत
    थोरथोरांनी शिकावी
    बाळाची या बाळरीत

    सांवळा ग रामचंद्र
    त्याचे अनुज हे तीन
    माझ्या भाग्याच्या श्लोकाचे
    चार अखंड चरण

    सांवळा ग रामचंद्र
    करी बोबडे भाषण
    त्याशी करितां संवाद
    झालों बोबडे आपण

    सांवळा ग रामचंद्र
    करी बोबडे हें घर
    वेद म्हणतां विप्रांचे
    येती बोबडे उच्‍चार

    सांवळा ग रामचंद्र
    चंद्र नभींचा मागतो
    रात जागवितो बाई
    सारा प्रासाद जागतो

    सांवळा ग रामचंद्र
    उद्यां होईल तरुण
    मग पुरता वर्षेल
    देवकृपेचा वरुण